192. இப்னு அபூஹாதிம்-அப்துர்ரஹ்மான் பின் முஹம்மத்-அபூமுஹம்மத் (ரஹ்) அவர்கள் கூறியதாவது:

நான் என் தந்தை (அபூஹாதிம்) அவர்களிடம் யஹ்யா பின் அய்யூப் அவர்களின் வழியாக முரண்பட்ட அறிவிப்பாளர்தொடரில் அறிவிக்கப்படும் ஒரு ஹதீஸ் பற்றி கேட்டேன்.

அந்த ஹதீஸ்:

நபி (ஸல்) அவர்கள் கூறினார்கள்:

அல்லாஹ்வையும், மறுமை நாளையும் நம்பிக்கை கொண்ட எவரும் கீழாடையின்றி (பொதுக்) குளிப்பிடங்களில் நுழைய வேண்டாம். அல்லாஹ்வையும், மறுமை நாளையும் நம்பிக்கை கொண்ட உங்களது பெண்களில் எவரும் (பல பெண்கள் சேர்ந்துக் குளிக்கும் பொதுக்) குளிப்பிடங்களில் நுழைய வேண்டாம்.

முரண்பட்ட அறிவிப்புகள்:

1 . யஹ்யா பின் அய்யூப் அவர்களிடமிருந்து அறிவிக்கும் அப்துல்லாஹ் பின் வஹ்ப் அவர்கள், யஹ்யா பின் அய்யூப் —> யஃகூப் பின் இப்ராஹீம் பின் அப்துல்லாஹ் பின் ஹுனைன் —> முஹம்மத் பின் ஸாபித் பின் ஷுரஹ்பீல் —> அப்துல்லாஹ் பின் யஸீத் —> அபூஅய்யூப் அல்அன்ஸாரீ (ரலி) என்ற அறிவிப்பாளர்தொடரில் அறிவித்துள்ளார்.

2 . யஹ்யா பின் அய்யூப் அவர்களிடமிருந்து அறிவிக்கும் லைஸ் பின் ஸஃத், அம்ர் பின் ரபீஉ பின் தாரிக் ஆகிய இருவரும், யஹ்யா பின் அய்யூப் —> யஃகூப் பின் இப்ராஹீம் பின் அப்துல்லாஹ் பின் ஹுனைன் —> முஹம்மத் பின் ஸாபித் பின் ஷுரஹ்பீல் —> அப்துல்லாஹ் பின் ஸுவைத் அல்கத்மீ —> அபூஅய்யூப் அல்அன்ஸாரீ (ரலி) என்ற அறிவிப்பாளர்தொடரில் அறிவித்துள்ளனர்.

3 . என்றாலும் இதில் லைஸ் பின் ஸஃத் தனது அறிவிப்பாளர்தொடரில் ஒரு நபரை கூடுதலாகக் குறிப்பிட்டுள்ளார். அவரின் அறிவிப்பாளர் தொடர் கீழ்க்கண்டவாறு உள்ளது.

யஹ்யா பின் அய்யூப் —> யஃகூப் பின் இப்ராஹீம் பின் அப்துல்லாஹ் பின் ஹுனைன் —> அப்துர்ரஹ்மான் பின் ஜுபைர் —> (பனூ அப்துத்தார் கோத்திரத்தைச் சேர்ந்த) முஹம்மத் பின் ஸாபித் பின் ஷுரஹ்பீல் —> அப்துல்லாஹ் பின் ஸுவைத் அல்கத்மீ —> அபூஅய்யூப் அல்அன்ஸாரீ (ரலி)

அதற்கு என் தந்தை அபூஹாதிம் அவர்கள், “இந்த அறிவிப்பாளர்தொடர்களில் “அப்துல்லாஹ் பின் ஸுவைத் அல்கத்மீ”  என்று கூறப்படும் அறிவிப்பாளர்தொடரே மிகச் சரியானது” என்று கூறினார்.

அபூமுஹம்மத் (எனும் இப்னு அபூஹாதிம்) ஆகிய நான் கூறுகிறேன்:

அல்லாஹ்வே நன்கறிந்தவன். என்னைப் பொறுத்தவரை, இப்னு வஹ்ப் அவர்கள் அறிவிக்கும், யஹ்யா பின் அய்யூப் —> யஃகூப் பின் இப்ராஹீம் பின் அப்துல்லாஹ் பின் ஹுனைன் —> முஹம்மத் பின் ஸாபித் பின் ஷுரஹ்பீல் —> அப்துல்லாஹ் பின் யஸீத் அல்கத்மீ —> அபூஅய்யூப் அல்அன்ஸாரீ (ரலி) என்ற அறிவிப்பாளர்தொடரே மிகவும் சரியானதாகும்.