16828. ஈஸா பின் தல்ஹா (ரஹ்) அவர்கள் கூறியதாவது:

நாங்கள் முஆவியா (ரலி) அவர்களை சந்தித்த போது, பாங்கு சொல்பவர் தொழுகைக்கு அழைப்பு விடுத்தார். அப்போது அவர், “அல்லாஹு அக்பர், அல்லாஹு அக்பர்” என்று கூறினார். அதற்கு முஆவியா (ரலி) அவர்கள், “அல்லாஹு அக்பர், அல்லாஹு அக்பர்” என்று பதிலளித்தார்கள்.

பின்னர் பாங்கு சொல்பவர், “அஷ்ஹது அல் லா இலாஹ இல்லல்லாஹ்” (அல்லாஹ்வைத் தவிர வேறு இறைவன் இல்லை என்று நான் சாட்சி கூறுகிறேன்) என்று கூறினார். அதற்கு முஆவியா (ரலி) அவர்கள், “நானும் சாட்சி கூறுகிறேன்” என்று குறிப்பிட்டார்.

(அபூஆமிர் அவர்களின் அறிவிப்பில்: “அல்லாஹ்வைத் தவிர வேறு இறைவன் இல்லை என்று நானும் சாட்சி கூறுகிறேன்” என்று உள்ளது)

பிறகு பாங்கு சொல்பவர், “அஷ்ஹது அன்ன முஹம்மதர் ரஸூலுல்லாஹ்” (முஹம்மது (ஸல்) அவர்கள் அல்லாஹ்வின் தூதர் என்று நான் சாட்சி கூறுகிறேன்) என்று கூறினார். அதற்கு முஆவியா (ரலி) அவர்கள், “நானும் சாட்சி கூறுகிறேன்” என்று குறிப்பிட்டார்.

(அபூஆமிர் அவர்களின் அறிவிப்பில்: முஹம்மது (ஸல்) அவர்கள் அல்லாஹ்வின் தூதர் என்று நானும் சாட்சி கூறுகிறேன்” என்று உள்ளது)

யஹ்யா பின் கஸீர் (ரஹ்) அவர்கள் கூறினார்:

பாங்கு சொல்பவர் “ஹய்ய அலஸ்ஸலாஹ்” (தொழுகையின்பால் வாருங்கள்) என்று கூறியபோது, முஆவியா (ரலி) அவர்கள், “லா ஹவ்ல வலா குவ்வத்த இல்லா பில்லாஹ்” (அல்லாஹ்வின் உதவியின்றி எந்த சக்தியும் இல்லை, எந்த வல்லமையும் இல்லை) என்று சொன்னதாக ஒரு மனிதர் எங்களுக்கு அறிவித்தார்.

(இறுதியில்) முஆவியா (ரலி) அவர்கள், “உங்களுடைய நபி (ஸல்) அவர்கள் இவ்வாறு சொல்வதை நான் செவியுற்றேன்” என்று கூறினார்கள்.