27240. வாயில் பின் ஹுஜ்ர் (ரலி) அவர்கள் கூறியதாவது:

ஒரு பெண் (இரவில் ஜமாஅத்) தொழுகைக்காகப் புறப்பட்டுச் சென்றார். வழியில் ஒரு மனிதர் அவரை வழிமறித்து, தனது ஆடையால் அவரை வலுக்கட்டாயமாக மூடி, அவரிடம் தனது இச்சையை நிறைவேற்றிக் கொண்டார். பின்னர் அந்த மனிதர் அங்கிருந்து தப்பி ஓடிவிட்டார்.

அதன் பின், அவ்வழியே மற்றொரு மனிதர் கடந்து சென்றபோது, அப்பெண் அவரிடம், “ஒரு மனிதர் என்னிடம் இப்படி இப்படியெல்லாம் அநீதி இழைத்துவிட்டார்” என்று கூறினார். உடனே அந்த மனிதர் குற்றவாளியைத் தேடி விரைந்தார்.

அதற்குள், அன்சாரிகளைச் சேர்ந்த ஒரு குழுவினர் அப்பெண் இருக்கும் இடத்திற்கு வந்தனர். அப்பெண் அவர்களிடமும், “ஒரு மனிதர் என்னிடம் இப்படி இப்படியெல்லாம் செய்துவிட்டார்” என்று கூறினார். அவர்களும் குற்றவாளியைத் தேடிப் புறப்பட்டனர்.

(தேடிச் சென்ற அன்சாரிகள்) உண்மைக் குற்றவாளியைத் தேடிச் சென்ற அந்த இரண்டாவது மனிதரையே குற்றவாளி எனத் தவறாகக் கருதிப் பிடித்து வந்தனர். அவரை அல்லாஹ்வின் தூதர் (ஸல்) அவர்களிடம் கொண்டு வந்தபோது, அப்பெண்ணும் (பதற்றத்தில்) “இவர் தான் அவர்!” என்று அடையாளங்காட்டினார்.

அல்லாஹ்வின் தூதர் (ஸல்) அவர்கள் (தவறாகப் பிடிக்கப்பட்ட) அந்த மனிதருக்குக் கல்லெறிந்து மரண தண்டனை (ரஜ்ம்) நிறைவேற்றுமாறு கட்டளையிட்டார்கள். அப்போது, அப்பெண்ணுக்கு உண்மையிலேயே அநீதி இழைத்த அந்த முதலாவது மனிதர் (தானாக முன்வந்து), “அல்லாஹ்வின் தூதரே! அல்லாஹ்வின் மீது ஆணையாக, குற்றவாளி அவரில்லை, நான்தான்!” என்று கூறினார்.

உடனே அல்லாஹ்வின் தூதர் (ஸல்) அவர்கள் அப்பெண்ணைப் பார்த்து, “நீ போகலாம், நிச்சயமாக அல்லாஹ் உன்னை மன்னித்துவிட்டான் (உன் மீது குற்றமில்லை)” என்று கூறினார்கள். தவறாகப் பிடிக்கப்பட்ட அந்த மனிதரிடமும் கனிவான வார்த்தைகளைக் கூறி (அவரை விடுவித்தார்கள்).

பின்னர் அங்கிருந்தவர்கள், “அல்லாஹ்வின் நபியே! (குற்றத்தை ஒப்புக்கொண்ட) இவருக்குக் கல்லெறிந்து தண்டனை வழங்க மாட்டீர்களா?” என்று கேட்டனர். அதற்கு நபி (ஸல்) அவர்கள், “இவருடைய பாவமன்னிப்பை மதீனாவாசிகள் அனைவருக்கும் பங்கிட்டுக் கொடுத்தாலும், அது அவர்கள் அனைவரின் பாவங்களும் மன்னிக்கப்படப் போதுமானதாகும்! அந்தளவுக்கு அவர், (அல்லாஹ்விடம் சிறந்த முறையில்) பாவமன்னிப்பு கோரியுள்ளார் என்று கூறினார்கள்.