பாடம்:

அத்தியாயம்: 55

அர்ரஹ்மான் – அளவிலா அருளாளன்.

3291. ஜாபிர் பின் அப்துல்லாஹ் (ரலி) அவர்கள் கூறியதாவது:

நபி (ஸல்) அவர்கள் தங்கள் தோழர்களிடம் சென்று (அல்குர்ஆன்: 55:1-78) எனும் அர்ரஹ்மான் அத்தியாயத்தை அதன் ஆரம்பம் முதல் இறுதி வரை ஓதிக் காட்டினார்கள். ஆனால் அவர்கள் அமைதியாக இருந்தனர்.

உடனே, நபி (ஸல்) அவர்கள், “நான் இதை ஜின்களிடம் ‘ஜின்களின் இரவில்’ ஓதிக்காட்டினேன். அவர்கள் உங்களைவிடச் சிறப்பாகப் பதிலளித்தார்கள். நான், ‘(மக்களே, ஜின்களே!) உங்கள் இருவரின் இறைவனின் அருட்கொடைகளில் எதை நீங்கள் பொய்யாக்குவீர்கள்?’ என்ற வசனத்தைக் கடக்கும்போதெல்லாம், ‘எங்களின் இரட்சகனே! உனது அருட்கொடைகளில் எதையும் நாங்கள் பொய்யாக்கவில்லை. உனக்கே எல்லாப் புகழும்’ என்று அவர்கள் கூறினார்கள்” என்றார்கள்.

திர்மிதீ இமாம் கூறுகிறார்:

இது “ஃகரீப்” எனும் தரத்தில் அமைந்த செய்தியாகும். இதை வலீத் பின் முஸ்லிம் —> ஸுஹைர் பின் முஹம்மத் என்ற அறிவிப்பாளர்தொடர் வழியாகவே நாம் அறிகிறோம்.

அஹ்மத் பின் ஹன்பல் (ரஹ்) அவர்கள் கூறியதாவது: “ஷாம் நாட்டின் ஸுஹைர் பின் முஹம்மத் என்பவர் வேறு. ஈராக் நாட்டின் ஸுஹைர் பின் முஹம்மத் என்பவர் வேறு. (இவ்வாறு அஹ்மத் அவர்கள் கூறிய காரணம்) ஷாம் நாட்டினர் இவரிடமிருந்து முன்கரான செய்திகளை அறிவித்துள்ளனர் என்பதால் ஆகும். அறிவிப்பாளர்கள் இவரின் பெயரை மாற்றியிருக்கலாம்.

மேலும், முஹம்மத் பின் இஸ்மாயில்-புகாரி இமாம் அவர்கள் பின்வருமாறு கூறியதை நான் செவியுற்றுள்ளேன்:

ஷாம் நாட்டைச் சேர்ந்த அறிவிப்பாளர்கள் ஸுஹைர் பின் முஹம்மத் அவர்களிடமிருந்து முன்கரான செய்திகளை அறிவித்துள்ளனர். ஆனால், ஈராக் நாட்டைச் சேர்ந்த அறிவிப்பாளர்கள் அவரிடமிருந்து சரியான ஹதீஸுக்கு நெருக்கமானவற்றை அறிவித்துள்ளனர்.