710.

திர்மிதீ இமாம் கூறுகிறார்:

இத்தலைப்பில் கஃபு பின் ஆசிம் (ரலி), பின் அப்பாஸ் (ரலி), அபூஹுரைரா (ரலி) ஆகியோர் வழியாகவும் செய்திகள் வந்துள்ளன.

இமாம் திர்மிதீ கூறுகிறார்: « ஜாபிர் (ரலி) அவர்களின் ஹதீஸ் ‘ஹஸன் ஸஹீஹ்’ எனும் தரத்தைச் சார்ந்ததாகும். »

நபி (ஸல்) அவர்கள், « பயணத்தில் நோன்பு நோற்பது நன்மையோ நற்செயலோ அன்று » என்று கூறியதாகவும் அறிவிக்கப்பட்டுள்ளது.

பயணத்தின்போது நோன்பு நோற்பது குறித்து மார்க்க அறிஞர்களிடையே கருத்து வேறுபாடு உள்ளது. நபித்தோழர்கள் மற்றும் பிற அறிஞர்களில் சிலர்: பயணத்தில் நோன்பை விட்டுவிடுவதே (நோற்காமல் இருப்பதே) சிறந்தது என்று கருதினர். பயணத்தில் நோன்பு நோற்றவர் அதை மீண்டும் (களா) நோற்க வேண்டும் என்று கூட அவர்களில் சிலர் கருதினர். இமாம் அஹ்மத் (ரஹ்), இமாம் இஸ்ஹாக் (ரஹ்) ஆகியோரும் பயணத்தின்போது நோன்பை விட்டுவிடுவதையே தேர்வு செய்தனர்.

நபித்தோழர்கள் மற்றும் பிற அறிஞர்களில் இன்னும் சிலர்: “ஒருவர் தன்னிடம் சக்தி இருந்து நோன்பு நோற்றால் அது நல்லதாகும்; அதுவே சிறந்ததும் ஆகும். அவர் நோன்பை விட்டுவிட்டாலும் அதுவும் நல்லதே” என்று கூறினர். இதுவே சுஃப்யான் அத்-தவ்ரீ (ரஹ்), மாலிக் பின் அனஸ் (ரஹ்), அப்துல்லாஹ் பின் அல்-முபாரக் (ரஹ்) ஆகியோரின் கூற்றாகும்.

இமாம் ஷாஃபியீ (ரஹ்) கூறுகிறார்: « பயணத்தில் நோன்பு நோற்பது நன்மையாகாது » என்ற நபி (ஸல்) அவர்களின் கூற்றுக்கும், சிலர் நோன்பு நோற்ற செய்தி எட்டியபோது « அவர்களே மாறுசெய்தவர்கள் » என்று நபிகளார் கூறியதற்கும் என்ன பொருளென்றால் — அல்லாஹ்வின் சலுகையை மனப்பூர்வமாக ஏற்றுக்கொள்ள மனமின்றி நோன்பு நோற்பவரையே அது குறிக்கும். மாறாக, நோன்பை விட்டுவிடுவதை அனுமதிக்கப்பட்ட சலுகையாகக் கருதி, உடலிலும் சக்தி இருந்து ஒருவர் நோன்பு நோற்றால், அதுவே எனக்கு மிகவும் விருப்பமானதாகும்.