Category: நஸாயி

بسم الله الرحمن الرحيم

அளவிலா அருளாளன், நிகரிலா அன்புடையோன் அல்லாஹ்வின் திருப்பெயரால்…

அத்தியாயம்: 1

தூய்மை.

பாடம்: 1

நம்பிக்கை கொண்டோரே! நீங்கள் தொழுகைக்காகத் தயாராகும்போது உங்கள் முகங்களையும், மூட்டுக்கள் வரை உங்கள் கைகளையும், கரண்டை வரை உங்கள் கால்களையும் கழுவிக் கொள்ளுங்கள்! (அல்குர்ஆன் 5:6) என்று துவங்கும் வசனத்தின் விளக்கம்.

1 . நபி (ஸல்) அவர்கள் கூறினார்கள்:

உங்களில் ஒருவர் தூக்கத்திலிருந்து விழித்தெழுந்தால் தமது கையை மூன்று முறை கழுவாமல் உளூ தண்ணீரின் பாத்திரத்திற்குள் இட வேண்டாம். ஏனெனில், இரவில் அவரது கை எங்கே இருந்தது என்பதை அவர் அறியமாட்டார்.

அறிவிப்பவர்: அபூஹுரைரா (ரலி)

பாடம்: 2

இரவில் எழுந்ததும் பல் துலக்குதல்.

2 . ஹுதைஃபா (ரலி) அவர்கள் கூறியதாவது:

அல்லாஹ்வின் தூதர் (ஸல்) அவர்கள் இரவில் எழும்போது, பல்துலக்கும் குச்சியால் தம் பற்களை நன்கு தேய்த்துத் துலக்குவார்கள்.

பாடம்: 3

பல்துலக்குவது எவ்வாறு?

3 . அபூமூஸா (ரலி) அவர்கள் கூறியதாவது:

நான் அல்லாஹ்வின் தூதரிடம், அவர்கள் பல் துலக்கிக் கொண்டிருந்தபோது சென்றேன். அப்போது பல்துலக்கும் குச்சியின் ஒரு பகுதி அவர்கள் நாவில் இருக்க, ‘அவ், அவ்’ என்று சப்தமிட்டார்கள்.

பாடம்: 4

தலைவர், தமது குடிமக்கள் முன்னிலையில் பல்துலக்கலாமா?

4 . நான் நபி (ஸல்) அவர்களிடம் (எனது) ‘அஷ்அரீ’ குலத்தைச் சார்ந்த இருவரோடு வந்தேன். ஒருவர் என் வலப்புறத்திலும் இன்னொருவர் என் இடப்புறத்திலும் இருந்தனர். அப்போது, அல்லாஹ்வின் தூதர் (ஸல்) அவர்கள் பல் துலக்கிக் கொண்டிருந்தார்கள். அப்போது, அவ்விருவருமே (நபி-ஸல்) அவர்களிடம் அரசுப்) பதவி தருமாறு கேட்டனர்.

நான், “உங்களை சத்திய (மார்க்க)த்துடன் அனுப்பியவன் மேல் ஆணையாக! இவ்விருவரும் தம் மனங்களில் கொண்டிருந்த எண்ணத்தை என்னிடம் வெளிப்படுத்தவே இல்லை. இவர்கள் பதவி கேட்டே வருகிறார்கள் என்று நான் நினைக்கவுமில்லை” என்று கூறினேன்.

அப்போது, நபி (ஸல்) அவர்களின் இதழுக்குக் கீழ் துருத்திக் கொண்டிருந்த அந்தப் பல்துலக்கும் குச்சியை இப்போதும்கூட நான் பார்ப்பதைப் போன்றுள்ளது.

அப்போது நபி (ஸல்) அவர்கள், “நாம் பதவியை விரும்புவோருக்கு உதவ (அல்லது உதவவே) மாட்டோம்” என்று கூறிவிட்டு “நீங்கள் செல்லுங்கள்” என்று என்னிடம் கூறினார்கள்.

அறிவிப்பவர்: அபூமூஸா (ரலி)

(அபூமூஸா (ரலி) அவர்களை ஆளுநராக யமன் (எனும்) நாட்டுக்கு அனுப்பிவைத்தார்கள். பிறகு அவருக்கு துணையாக முஆத் பின் ஜபல் (ரலி) அவர்களையும் அனுப்பிவைத்தார்கள்)

பல் துலக்குவது வாய்க்குத் தூய்மையாகும்! இறைவனுக்குத் திருப்தியாகும் என்று நபி (ஸல்) அவர்கள் கூறினார்கள்.

அறிவிப்பவர்: ஆயிஷா (ரலி)

பாடம்: 5

பல்துலக்க ஆர்வமூட்டுதல்.

5. பல் துலக்குவது வாய்க்குத் தூய்மையாகும்! இறைவனுக்குத் திருப்தியாகும் என்று நபி (ஸல்) அவர்கள் கூறினார்கள்.

அறிவிப்பவர்: ஆயிஷா (ரலி)

பாடம்: 6

அதிகமாகப் பல்துலக்குதல்.

6 . அல்லாஹ்வின் தூதர் (ஸல்) அவர்கள் கூறினார்கள்:

பல்துலக்குவது குறித்து உங்களுக்கு நான் அதிகமாகவே வலியுறுத்தியிருக்கிறேன்.

அறிவிப்பவர்: அனஸ் (ரலி)

பாடம்: 7

நோன்பாளி மாலையில் பல்துலக்க அனுமதி.

7 . அபூஹுரைரா (ரலி) அவர்கள் கூறியதாவது:

என் சமுதாயத்திற்கு சிரமம் ஏற்பட்டுவிடும் என்ற நிலை மட்டும் இல்லாவிட்டால், ஒவ்வொரு தொழுகைக்காகவும் அவர்கள் பல்துலக்க வேண்டும் என்று நான் ஆணையிட்டிருப்பேன்” என்று அல்லாஹ்வின் தூதர் (ஸல்) அவர்கள் கூறினார்கள்.

பாடம்: 8

எல்லா நேரங்களிலும் பல்துலக்குதல்.

8 . ஷுரைஹ் பின் ஹானீ (ரஹ்) அவர்கள் கூறியதாவது:

வீட்டில் நுழைந்ததும் நபி (ஸல்) அவர்கள் முதலில் என்ன செய்வார்கள்?” என்று ஆயிஷா (ரலி) அவர்களிடம் நான் வினவினேன். அதற்கு ஆயிஷா (ரலி) அவர்கள், “பல்துலக்குவார்கள்” என்று பதிலளித்தார்கள்.

பாடம்: 9

இயற்கையான வழிமுறைகள்:

‘கத்னா’ செய்தல்.

9 . இயற்கையான வழிமுறைகள் ஐந்தாகும். அவை: 1. ‘கத்னா’ செய்தல், 2. மறைவிடமுடி களைதல், 3. மீசை கத்திரித்தல், 4. நகங்களை வெட்டுதல், 5. அக்குள் முடிகளைதல்” என்று அல்லாஹ்வின் தூதர் (ஸல்) அவர்கள் கூறினார்கள்.

அறிவிப்பவர்: அபூஹுரைரா (ரலி)