Bukhari-6329

---

---

பாடம்: 18

தொழுகைக்குப் பின்னால் ஓதும் பிரார்த்தனை.

அபூஹுரைரா (ரலி) அவர்கள் கூறியதாவது:

மக்கள் (சிலர்), “அல்லாஹ்வின் தூதரே! வசதி படைத்தோர் (உயர்) தகுதிகளையும் (சொர்க்கத்தின்) நிலையான இன்பங்களையும் (தட்டிக்) கொண்டுபோய்விடுகின்றனர்” என்று கூறினார்கள். நபி (ஸல்) அவர்கள், “அது எவ்வாறு?” என்று கேட்டார்கள். “(ஏழைகளாகிய) நாங்கள் தொழுவதைப் போன்றே அவர்களும் தொழுகின்றனர். (அறவழியில்) நாங்கள் போரிடுவதைப் போன்றே அவர்களும் போரிடுகின்றனர். தங்களது அதிகப்படியான செல்வங்களை (நல்வழியில்) செலவிடுகின்றனர். ஆனால், (அவ்வாறு செலவிட) எங்களிடம் பொருள்களேதும் இல்லையே?” என்று கூறினர்.

அதற்கு நபி (ஸல்) அவர்கள், “நான் உங்களுக்கு ஒன்றைத் தெரிவிக்கட்டுமா? (அதை நீங்கள் செயல்படுத்திவந்தால் இந்தச் சமுதாயத்தில்) உங்களை முந்திவிட்டவர்களையும் உங்களுக்குப் பின்னால் வருபவர்களையும் நீங்கள் எட்டிவிடுவீர்கள். இதைப் போன்று செய்பவரைத் தவிர, வேறு எவரும் நீங்கள் செய்ததற்கு நிகராகச் செய்திட முடியாது.

(அது யாதெனில்,) நீங்கள் ஒவ்வொரு தொழுகைக்குப் பின்பும் பத்து முறை ‘ஸுப்ஹானல்லாஹ்’ (அல்லாஹ் தூயவன்) என்றும், பத்து முறை ‘அல்ஹம்து லில்லாஹ்’ (எல்லாப் புகழும் அல்லாஹ்வுக்கே) என்றும், பத்து முறை ‘அல்லாஹு அக்பர்’ (அல்லாஹ் மிகவும் பெரியவன்) என்றும் கூறுங்கள்” என்று சொன்னார்கள்.

---

புகாரி இமாம் கூறுகிறார்:

இந்தச் செய்தியை வர்கா பின் உமர் அவர்கள் ஸுமைய் —> அபூஸாலிஹ் —> அபூஹுரைரா (ரலி) என்ற அறிவிப்பாளர்தொடரில் அறிவித்துள்ளதைப் போன்று உபைதுல்லாஹ் பின் உமர் அவர்களும் அறிவித்துள்ளார்.

இப்னு அஜ்லான் அவர்கள் ஸுமைய், ரஜாஉ பின் ஹய்வா ஆகியோரிடமிருந்து அபூஸாலிஹ் —> அபூஹுரைரா (ரலி) என்ற அறிவிப்பாளர்தொடரில் அறிவித்துள்ளார்.

ஜரீர் பின் அப்துல்ஹமீத் அவர்கள் அப்துல்அஸீஸ் பின் ருஃபைஃ —> அபூஸாலிஹ் —> அபுத்தர்தா (ரலி) என்ற அறிவிப்பாளர்தொடரில் அறிவித்துள்ளார்.

ஸுஹைல் பின் அபூஸாலிஹ் அவர்கள் அபூஸாலிஹ் —> அபூஹுரைரா (ரலி) —> நபி (ஸல்) என்ற அறிவிப்பாளர்தொடரில் அறிவித்துள்ளார்.

(இவைகள் அனைத்திலும் அறிவிப்பாளர்தொடரில் தான் முதாபஅத்-ஒற்றுமை உள்ளது. கருத்தில் அல்ல) 

---

அத்தியாயம்: 80

(புகாரி: 6329)

---

---