Tirmidhi-377

பாடம்:

பருவமடைந்த பெண், முக்காடு இல்லாமல் தொழும் தொழுகை ஏற்றுக்கொள்ளப்படாது என்பது குறித்து வந்துள்ளவை.

377. அல்லாஹ்வின் தூதர் (ஸல்) அவர்கள் கூறினார்கள்:

பருவமடைந்த பெண், முக்காடு இல்லாமல் தொழும் தொழுகை ஏற்றுக்கொள்ளப்படாது.

அறிவிப்பவர்: ஆயிஷா (ரலி)

திர்மிதீ இமாம் கூறுகிறார்:

இப்பாடப் பொருள் தொடர்பான செய்திகள் அப்துல்லாஹ் பின் அம்ர் (ரலி) அவர்கள் வழியாகவும் வந்துள்ளன.

ஆயிஷா (ரலி) அவர்கள் அறிவிக்கும் இந்த ஹதீஸ் ‘ஹஸன்’ எனும் தரத்தில் அமைந்ததாகும். மார்க்க அறிஞர்களிடம் இதன் அடிப்படையில் உள்ள நடைமுறை: ஒரு பெண் பருவம் அடைந்து, தொழும்போது அவளது தலைமுடியில் ஏதேனும் சிறிது வெளிப்பட்டிருந்தாலும் அவளது தொழுகை செல்லாது. மேலும் இதுவே இமாம் ஷாஃபிஈ (ரஹ்) அவர்களின் கருத்தாகும்.

மேலும் ஷாஃபிஈ (ரஹ்) அவர்கள் கூறினார்: பெண்ணின் உடலில் ஏதேனும் ஒரு பகுதி வெளிப்பட்டிருந்தால் அவளது தொழுகை செல்லாது.

அவளது இரு பாதங்களின் மேல்பகுதி வெளிப்பட்டிருந்தால் தொழுகை கூடும் என்றும் (சில அறிஞர்களால்) கூறப்பட்டுள்ளது என்றும் ஷாஃபிஈ (ரஹ்) அவர்கள் கூறினார்.