Author: Farook

599. ஹதீஸ் எண்-588 இல் வரும் செய்தி இந்த அறிவிப்பாளர்தொடரிலும் வந்துள்ளது.

திர்மிதீ இமாம் கூறுகிறார்:

இது “ஹஸன்” தரத்தில் அமைந்த ஹதீஸாகும்.

நபி (ஸல்) அவர்கள் பகலில் தொழுத உபரித் தொழுகை குறித்து அறிவிக்கப்பட்ட செய்திகளில், இதுவே மிகச் சிறந்ததாகும் என்று இஸ்ஹாக் பின் இப்ராஹிம்-இஸ்ஹாக் பின் ராஹவைஹி (ரஹ்) அவர்கள் கூறினார்.

இப்னுல் முபாரக் (ரஹ்) அவர்கள் இந்த ஹதீஸை பலவீனமானது எனக் கூறினார். அவர் ஏன் அப்படி கூறினார் என்றால் (அல்லாஹ்வே மிக அறிந்தவன்) இந்த ஹதீஸ் ஆஸிம் பின் ளம்ரா —> அலீ (ரலி) என்ற அறிவிப்பாளர்தொடரில் மட்டுமே வந்துள்ளது. வேறு எந்த வழியிலும் இது அறிவிக்கப்படவில்லை. எனினும், சில ஹதீஸ்துறை அறிஞர்கள் ஆஸிம் பின் ளம்ராவை நம்பகமானவர் என்று ஏற்றுக் கொண்டுள்ளனர்.

அலீ பின் மதீனி (ரஹ்) கூறினார்:

“ஹாரிஸ் என்பவரின் ஹதீஸை விட ஆஸிம் பின் ளம்ராவின் ஹதீஸ் சிறந்தது என்பதை நாங்கள் அறிந்திருந்தோம்” என்று ஸுஃப்யான் ஸவ்ரீ அவர்கள் கூறினார் என யஹ்யா பின் ஸயீத் அல்கத்தான் அவர்கள் கூறினார்.

பாடம்:

நபி (ஸல்) அவர்களின் பகல் நேர உபரியானத் தொழுகைகள் எவ்வாறு இருந்தன?

598. ஆஸிம் பின் ளம்ரா (ரஹ்) அவர்கள் கூறியதாவது:

நபி (ஸல்) அவர்களின் பகல் நேர (உபரித்) தொழுகை பற்றி அலி (ரலி) அவர்களிடம் நாங்கள் கேட்டோம். அப்போது அவர்கள், ‘அதற்கு உங்களால் இயலாது’ என்று கூறினார்கள். (அதற்கு) நாங்கள், ‘எங்களில் எவருக்கு இயலுமோ அவர் (அதைச் செய்யட்டும்)’ என்று கூறினோம்.

அதற்கு அலி (ரலி) அவர்கள் கூறினார்கள்:

சூரியன் அஸர் தொழுகையின் போது (மேற்குத் திசையில்) இருப்பது போன்று இருக்கும்போது (சூரிய உதயத்திற்கு பின்பு), நபி (ஸல்) அவர்கள் இரண்டு ரக்அத்கள் தொழுவார்கள்.

சூரியன் லுஹர் தொழுகையின் போது (நடுவானில்) இருப்பது போன்று இருக்கும்போது நான்கு ரக்அத்கள் (லுஹாத்) தொழுவார்கள்.

லுஹருக்கு முன் நான்கு ரக்அத்களும், அதற்குப் பின் இரண்டு ரக்அத்களும், அஸருக்கு முன் நான்கு ரக்அத்களும் தொழுவார்கள். ஒவ்வொரு இரண்டு ரக்அத்களுக்கும் இடையில் நெருக்கமான வானவர்கள், இறைத்தூதர்கள், மற்றும் அவர்களை அடுத்துள்ள முஃமின்கள், முஸ்லிம்கள் ஆகியோருக்கு ஸலாம் கூறிப் பிரிப்பார்கள்.

424. அலீ (ரலி) அவர்கள் கூறியதாவது:

நபி (ஸல்) அவர்கள் லுஹருக்கு முன் நான்கு ரக்அத்களும், அதற்குப் பின் இரண்டு ரக்அத்களும் தொழுபவர்களாக இருந்தார்கள்.

திர்மிதீ இமாம் கூறுகிறார்:

இப்பொடப் பொருள் தொடர்பான செய்திகள் ஆயிஷா (ரலி), உம்மு ஹபீபா (ரலி) ஆகியோர் வழியாகவும் வந்துள்ளன. அலி (ரலி) அவர்களின் இந்த ஹதீஸ் “ஹஸன்” தரத்தில் உள்ளதாகும்.

ஆஸிம் பின் ளம்ரா அவர்களின் ஹதீஸ் ஹாரிஸ் என்பவரின் ஹதீஸை விட சிறந்தது என்பதை நாங்கள் அறிந்திருந்தோம் என்று ஸுஃப்யான் ஸவ்ரீ (ரஹ்) அவர்கள் கூறியதாக யஹ்யா பின் ஸயீத் அவர்கள் அறிவித்துள்ளார்.

நபித்தோழர்கள், மற்றும் அவர்களுக்குப் பின் வந்த பெரும்பாலான அறிஞர்கள் இந்த ஹதீஸின் அடிப்படையில் செயல்படுகிறார்கள். லுஹருக்கு முன் நான்கு ரக்அத்களை சேர்த்து தொழுவதை அவர்கள் தேர்ந்தெடுத்துள்ளார்கள். இதுவே ஸுஃப்யான் ஸவ்ரீ (ரஹ்), அப்துல்லாஹ் பின் முபாரக் (ரஹ்), இஸ்ஹாக் பின் ராஹவைஹி (ரஹ்) ஆகியோரின் கருத்தும் ஆகும்.

வேறுசில அறிஞர்கள் இரவிலும் பகலிலும் தொழும் உபரியான தொழுகைகளை இரண்டிரண்டாக தொழுவதையே ஏற்கிறார்கள். ஒவ்வொரு இரண்டு ரக்அத்களுக்கு இடையில் பிரிப்பதை அவர்கள் சரியானதாகக் கருதுகிறார்கள். இதுவே ஷாஃபிஈ (ரஹ்), அஹ்மத் (ரஹ்) ஆகியோரின் கருத்தும் ஆகும்.