Musnad-Ahmad-2483

2483. இப்னு அப்பாஸ் (ரலி) அவர்கள் கூறியதாவது:

யூதர்கள் அல்லாஹ்வின் தூதர் (ஸல்) அவர்களிடம் வந்து, “அபுல் காசிமே! நாங்கள் உங்களிடம் ஐந்து விஷயங்கள் பற்றிக் கேட்கப் போகிறோம். அவற்றைப் பற்றி எங்களுக்கு நீங்கள் தெரிவித்தால், நீங்கள் ஒரு நபி என்பதை நாங்கள் அறிந்து உங்களைப் பின்பற்றுவோம்” என்றனர்.

உடனே (யஃகூப் அலை எனும்) இஸ்ராயீல் அவர்கள் தமது மகன்களிடம் உறுதிமொழி வாங்கியதைப் போன்ற ஒரு பலமான உறுதிமொழியை அல்லாஹ்வின் தூதர் (ஸல்) அவர்கள் அவர்களிடம் வாங்கினார்கள். (அப்போது யூதர்கள்,) “நாங்கள் சொல்வதற்கு அல்லாஹ்வே பொறுப்பாளன்” என்று கூறினர். அப்போது நபி (ஸல்) அவர்கள், “கேளுங்கள்” என்றார்கள்.

அதற்கு அவர்கள், “நபியின் அடையாளம் பற்றிக் எங்களுக்குக் கூறுங்கள்” என்றனர். நபி (ஸல்) அவர்கள், “அவருடைய கண்கள் உறங்கும்; ஆனால், அவருடைய உள்ளம் உறங்காது” என்று பதிலளித்தார்கள்.

அவர்கள், “பெண் எவ்வாறு பெண் குழந்தையைப் பெற்றெடுக்கிறாள்? எவ்வாறு ஆண் குழந்தையைப் பெற்றெடுக்கிறாள்? என்று (கருத்தரிப்பின் விதம்) எங்களுக்குக் கூறுங்கள்” என்றனர். நபி (ஸல்) அவர்கள், “இரு நீர்களும் (ஆண் மற்றும் பெண்ணின் இந்திரியம்) சங்கமிக்கின்றன. ஆணின் நீர் பெண்ணின் நீரை விட ஓங்கிவிட்டால் ஆண் குழந்தையாகிறது; பெண்ணின் நீர் ஆணின் நீரை விட ஓங்கிவிட்டால் பெண் குழந்தையாகிறது” என்று பதிலளித்தார்கள்.

அவர்கள், “இஸ்ராயீல் (யாகூப் நபி) தனக்குத்தானே எதைத் ஹராமாக (தடைசெய்து) கொண்டார்?” என்று கேட்டனர். நபி (ஸல்) அவர்கள், “அவருக்கு இடுப்பு நரம்பு வலி இருந்தது. ஒட்டகப்பால் தவிர வேறு எதையும் தனது நோய்க்குத் தகுந்த நிவாரணியாக அவர் காணவில்லை – (அறிவிப்பாளர்) அப்துல்லாஹ் பின் இப்னு முபாரக் அவர்களின் தந்தை கூறுகையில், ‘அவர்களில் சிலர் ஒட்டகத்தைக் குறிப்பிட்டனர்’ என்றார் – எனவே, அதன் மாமிசத்தை அவர் தமக்குத் தடைசெய்து கொண்டார்” என்று கூறினார்கள். அதற்கு அவர்கள், “உண்மை சொன்னீர்கள்” என்றனர்.

அவர்கள், “இந்த இடி என்றால் என்னவென்று எங்களுக்குக் கூறுங்கள்” என்றனர். நபி (ஸல்) அவர்கள், “அது என்னவெனில் மேகத்திற்காக நியமிக்கப்பட்ட அல்லாஹ்வின் வானவர்களில் ஒரு வானவர் இருக்கிறார். அவரின் கையில் – அல்லது அவரின் கைகளில் – நெருப்புச் சாட்டைக் கம்பு ஒன்று உள்ளது; அதன் மூலம் அவர் மேகங்களை அதட்டி, அல்லாஹ் கட்டளையிட்ட இடத்திற்கு அவற்றை ஓட்டிச் செல்கிறார்” என்று பதிலளித்தார்கள். அவர்கள், “நாங்கள் கேட்கும் இந்தச் சத்தம் என்ன?” என்று கேட்டனர். நபி (ஸல்) அவர்கள், “அது மேகத்தின் சத்தமாகும்” என்றார்கள்.

அதற்கு அவர்கள், “உண்மை சொன்னீர்கள். இப்போது ஒரே ஒரு கேள்வி மட்டுமே மீதமுள்ளது. அதற்கு நீங்கள் பதிலளித்துவிட்டால் நாங்கள் உங்களிடம் பைஅத் (பிரமாணம்) செய்வோம். ஏனெனில், எந்த ஒரு நபியும் தனக்குச் செய்தி கொண்டுவரும் ஒரு மலக்கைக் கொண்டேயன்றி இருப்பதில்லை. எனவே, உங்களின் தோழர் (வானவர்) யார் என்று எங்களுக்குக் கூறுங்கள்” என்றனர்.

நபி (ஸல்) அவர்கள், “அவர் ஜிப்ரீல் (அலை) ஆவார்” என்று பதிலளித்தார்கள். அதற்கு அவர்கள், “ஜிப்ரீலா?! போர்க்களம், சண்டை மற்றும் வேதனை ஆகியவற்றுடன் இறங்கும் நம்முடைய எதிரி அவர்தான்! நீங்கள் ‘மழையையும் பயிர்களையும் கருணை மழையையும் கொண்டுவரும் மீகாயீல்’ என்று சொல்லியிருந்தால் நாங்கள் உங்களைப் பின்பற்றியிருப்போம்” என்றனர்.

அப்போது வல்லமை மிக்க அல்லாஹ், ஜிப்ரீலுக்கு எவர் எதிரியாக இருக்கிறார்களோ…) என்ற (அல்குர்ஆன்: 2:97) ஆவது இறைவசனத்தை அதன் இறுதிவரை இறக்கி அருளினான்.