Bukhari-521

---

---

தொழுகை நேரங்கள்.

பாடம்: 1

தொழுகையின் சிறப்பும் அவற்றின் நேரங்களும்.

அல்லாஹ் கூறுகின்றான்:
நிச்சயமாக குறிப்பிட்ட நேரங்களில் தொழுகையை நிறைவேற்றுவது நம்பிக்கையாளர்களுக்கு விதியாக்கப்பெற்றுள்ளது.
(அல்குர்ஆன்: 4:103)

(இந்த வசனத்தின் மூலத்திலுள்ள மவ்கூத்’ எனும் சொற்றொடரும்) மவக்கத்’ எனும் சொல்லும் தவ்கீத்’எனும் வேர்ச் சொல்லிலிருந்து பிரிந்தவையேயாகும். இதன் கருத்தாவது: நம்பிக்கையாளர்கள் மீது அவற்றிற்கான நேரத்தை அல்லாஹ் வரையுறுத்துள்ளான்.

ஸுஹ்ரீ (ரஹ்) அறிவித்தார்:

உமர் பின் அப்துல்அஸீஸ் ஒரு நாள் தொழுகையைத் தாமதப் படுத்திவிட்டார்கள். அப்போது உர்வா பின் ஸுபைர் அவரிடம் வந்து பின்வரும் நிகழ்ச்சியைக் கூறி (அவரின் செயலைக் கண்டிக்கலா)னார்கள்.

இராக்கில் இருக்கும்போது ஒரு நாள் முஃகீரா பின் ஷுஅபா (ரலி) தொழுகையைத் தாமதப் படுத்திவிட்டார்கள். அப்போது அபூமஸ்ஊத் அன்ஸாரி (ரலி), அவரிடம் வந்து, ‘முஃகீராவே! இது என்ன? ஜிப்ரீல் (அலை) அவர்கள் இறங்கி (ஃபஜ்ருத்) தொழ, நபி (ஸல்) அவர்களும் தொழுதார்கள். பின்பு (லுஹர்) தொழ, நபி (ஸல்) அவர்களும் தொழுதார்கள். பின்பு (அஸர்) தொழ நபி (ஸல்) அவர்களும் தொழுதார்கள். பின்பு (மஃக்ரிப்) தொழ நபி (ஸல்) அவர்களும் தொழுதார்கள். பின்பு இஷா தொழ, நபி (ஸல்) அவர்களும் தொழுதார்கள். பின்னர் நபியிடம், “இந்நேரங்களில் தொழ வேண்டும் என்றே உமக்குக் கட்டளையிடப்பட்டுள்ளது” என்று ஜிப்ரீல் (அலை) அவர்கள் கூறினார்கள். இதை நீர் அறியவில்லையா?’ என்று கேட்டார்கள்.

(இந்த நிகழ்ச்சியை உர்வா பின் ஸுபைர், உமர் பின் அப்துல்அஸீஸ் அவர்களிடம் கூறிய போது) ‘உர்வாவே நீர் கூறுவது என்னவென்பதைக் கவனித்துப் பாரும்! நபி (ஸல்) அவர்களுக்குத் தொழுகையின் நேரத்தை ஜிப்ரீல் (அலை) அவர்கள் நிர்ணயித்தார்களா?’ என்று உமர் பின் அப்துல்அஸீஸ் கேட்டார்கள். அதற்கு உர்வா (ரஹ்) அவர்கள், “(ஆம்) இவ்வாறுதான் பஷீர் பின் அபூமஸ்ஊத் (ரஹ்) அவர்கள் தம் தந்தை அபூமஸ்ஊத் (ரலி) அவர்களிடமிருந்து அறிவிப்புச் செய்பவர்களாக இருந்தார்கள்” என்று பதிலளித்தார்கள்.

அத்தியாயம்: 9

(புகாரி: 521)

---

---