Author: Abdul Hakkim

24768. ஆயிஷா (ரலி) அவர்கள் கூறியதாவது:

“என் சகோதரியின் மகனே! அல்லாஹ்வின் தூதர் (ஸல்) அவர்களின் தலைமுடி காது மடலுக்கு மேல், தோள்பட்டைக்கு கீழ் இருந்தது.

அல்லாஹ்வின் மீது ஆணையாக, என் சகோதரியின் மகனே! முஹம்மது நபி (ஸல்) அவர்களின் குடும்பத்தில் ஒரு மாதம் கழிந்துவிடும். அப்படி இருந்தும் நபி (ஸல்) அவர்களின் வீட்டில் நெருப்பு மூட்டப்பட்டிருக்காது. (எப்போதாவது சிறிது இறைச்சி கிடைத்தாலே தவிர). அப்போது எங்கள் உணவு இரண்டு கருப்பானவைதான்: ஒன்று தண்ணீர். மற்றொன்று பேரீச்சம் பழம்.

எங்கள் வீட்டருகில் அன்சாரித் தோழர்களின் வீடுகள் இருந்தன. அவர்களுக்கு அல்லாஹ் எப்போதும் சிறந்த கூலியைக் கொடுப்பானாக! அவர்கள் ஒவ்வொரு நாளும் அல்லாஹ்வின் தூதர் (ஸல்) அவர்களுக்கு, அவர்களின் ஆடுகளிலிருந்து நிறைய பால் அனுப்புவார்கள். அதிலிருந்து அல்லாஹ்வின் தூதர் (ஸல்) அவர்களுக்குப் பால் கிடைக்கும்.

என் (வீட்டு) நிலைப்பேழையிலிருந்த தொலி நீக்கப்படாத சிறிது (வாற்)கோதுமையைத் தவிர, உயிருள்ளவர் உண்ணக்கூடிய பொருள் எதுவும் என் (வீட்டு) நிலைப்பேழையில் இல்லாத நிலையில் தான் அல்லாஹ்வின் தூதர் (ஸல்) அவர்கள் இறந்தார்கள். அதிலிருந்து எடுத்து நீண்ட காலம் நான் உண்டேன். பிறகு அதை நான் அளந்(து பார்த்)தேன். அதனால் (சிறிது காலத்திற்குள்) அது தீர்ந்துபோய்விட்டது.

10706. அபூஹுரைரா (ரலி) அவர்கள் கூறியதாவது:

ஒரு ஆடு சமைக்கப்பட்டது. அப்போது அல்லாஹ்வின் தூதர் (ஸல்) அவர்கள், “எனக்கு அதன் முன்னங்கால் ஒன்றை எடுத்துத் தாருங்கள்” என்று கூறினார்கள். (நபித்தோழர் ஒருவர்) அதை நபி (ஸல்) அவர்களிடம் கொடுத்தார். நபி (ஸல்) அவர்கள் மீண்டும், “எனக்கு அதன் முன்னங்கால் ஒன்றை எடுத்துத் தாருங்கள்” என்று கூறினார்கள். அதையும் அவர் கொடுத்தார்.

பிறகு நபி (ஸல்) அவர்கள், “எனக்கு அதன் முன்னங்கால் ஒன்றை எடுத்துத் தாருங்கள்” என்று கூறினார்கள். அதற்கு அந்த நபித்தோழர், “அல்லாஹ்வின் தூதரே! ஆட்டுக்கு இரண்டு முன்னங்கால்கள் தானே உள்ளன!” என்று கூறினார்.

நபி (ஸல்) அவர்கள், “(உறுதியாக) நீ அதைத் தேடியிருந்தால், (இன்னொன்றையும்) கண்டிருப்பாய்” என்று கூறினார்கள்.

பாடம்:

துகைன் பின் ஸயீத் அல்கஸ்அமீ (ரலி) அவர்களின் ஹதீஸ்.

17576. துகைன் (ரலி) கூறியதாவது:

நாங்கள் நானூற்று நாற்பது பேர், அல்லாஹ்வின் தூதர் (ஸல்) அவர்களிடம் உணவு கேட்டு வந்தோம். அப்போது நபி (ஸல்) அவர்கள் உமர் (ரலி) அவர்களிடம், “எழுந்து இவர்களுக்குக் கொடுங்கள்” என்று கூறினார்கள். அதற்கு உமர் (ரலி) அவர்கள், “அல்லாஹ்வின் தூதரே! என்னிடம் எனக்கும் என் பிள்ளைகளுக்கும் கோடை காலத்திற்குப் போதுமான அளவு தவிர வேறெதுவும் இல்லை” என்று கூறினார்கள். (அறிவிப்பாளர் வகீஉ கூறுகிறார்: அரபியரின் வழக்கில், கோடை காலம் என்பது நான்கு மாதங்கள் ஆகும்.)

நபி (ஸல்) அவர்கள் மீண்டும், “எழுந்து இவர்களுக்குக் கொடுங்கள்” என்று கூறினார்கள். உமர் (ரலி) அவர்கள், “அல்லாஹ்வின் தூதரே! செவியேற்றோம், கட்டுப்பட்டோம்” என்று கூறிவிட்டு, எழுந்தார்கள். நாங்களும் அவர்களுடன் எழுந்தோம். அவர்கள் எங்களை அவர்களுடைய அறைக்கு அழைத்துச் சென்றார்கள். தம் இடுப்பில் இருந்த சாவியை எடுத்து, கதவைத் திறந்தார்கள்.

துகைன் (ரலி) கூறுகிறார்:

அந்த அறையில், படுத்திருக்கும் ஒட்டகக் குட்டியைப் போன்ற பேரீச்சம் பழக் குவியல் இருந்தது. உமர் (ரலி) அவர்கள், “உங்களுக்கு வேண்டியதை எடுத்துக்கொள்ளுங்கள்” என்று கூறினார்கள். நாங்கள் ஒவ்வொருவரும் தமக்கு வேண்டிய அளவு எடுத்துக்கொண்டோம்.